அவியல் 09.12.08 – பாவம் ஷகீலா!

அந்தக் கவிஞர் தனது நண்பர்களோடு சிற்றுண்டிக்கு செல்கிறார். தோசை கொண்டுவரச் சொல்கிறார்கிறார்கள். பணியாளர் தோசையுடன் வரத் தாமதமாகிறது. தூரத்தே அவன் வரும்போது நண்பர்கள் கவிஞரிடம் “அவனுக்கு சட்’டென்று ஒரு கவிதை சொல்லு பார்ப்போம்” என்று சவால் விடுகிறார்கள். பக்கத்தில் அவன் வந்ததும் ‘பட்’டென வெண்பா சொல்கிறார் கவிஞர்....

“ஏண்டா இதற்குப்போய் இவ்வளவு நேரமா
போண்டா எடுத்துவா போ”

யாரந்தக் கவிஞர்...? கடைசியில் பார்ப்போம்.

**********************
நான் எந்த மெயில் அனுப்பினாலும் முடிவில் அளவில்லா அன்போடு.. கிருஷ்ணா’ என்று முடிப்பது வழக்கம். சில மெய்ல்த்ரெட் நடப்பில் இருக்கும்போது, இந்த அளவில்லா அன்போடு-வை நம்ம ஃப்ரெண்ட்ஸ் போட்டு, தாளிக்கும் தாளிப்பைப் பாருங்கள்...


அளவில்லா அட்டெண்டன்ஸோடு, அளவில்லா மப்போடு, மனமில்லா குசும்போடு, காலி வயிறோடு, அளவிலா ஆர்வத்தோடு, அளவில்லா அலுப்போடு, அளவில்லா அளவோடு அளவில்லா பியரோடு, அளவில்லா ஏழரையோடு, அளவில்லா துயரத்தோடு, அளவில்லா எதிர்பார்ப்புகளோடு அளவில்லா எச்சரிக்கையோடு, ஆப்புவைக்கும் அன்போடு., அளவான அளவோடு....

நம்ம ஃப்ரெண்ட்ஸ் கலக்கறாங்கப்பா!

***************************

ட்வெண்டி-20 படம் பார்த்தேன். மலையாளம்.

பெங்களூரில் ஒரு கொலை. அதைச் செய்தவனைக் கைது செய்கிறார் நேர்மையான போலீஸ் அதிகாரி சுரேஷ்கோபி. அவனை ஜாமீனில் எடுக்கிறார் அவனது திறமையான வழக்கறிஞர் மம்முட்டி. ஜாமீனில் வெளிவந்த அவனைக் கொல்கிறார் தாதா மோகன்லால். மோகன்லாலை யாரென்று தெரியாமல், வாதாடி நிரபராதி என்று வெளியே கொண்டுவருகிறார் மம்முட்டி. பிறகு அவரை போலீஸ் சுரேஷ்கோபியிடம் மாட்டிவிடுகிறார். அவர் தப்பிக்கும்போது உதவுகிறார் மம்முட்டி. மூன்றுபேரும் க்ளைமாக்ஸில் வில்லன்களைப் போட்டுத் தள்ளுகிறார்கள்.

குழப்பமாய் இருக்கிறதா? படம் ஒன்றும் குழப்பவில்லை. இதை தெளிவாக காரணகாரியங்களோடும், காமெடியோடும் நகர்த்தி வெற்றிப் படமாக்கியிருக்கிறார்கள்!

சுரேஷ்கோபி, மம்முட்டி, மோகன்லால் என்று ஒவ்வொருவரின் என்ட்ரிக்கும் வித்தியாசமாக யோசித்து எல்லோருடைய ரசிகர்களின் திருப்திக்கும் உழைத்திருக்கும் இயக்குனர் சபாஷ் போடப்பட வேண்டியவர்.

மலையாள திரைப்பட சம்மேளனமான ‘அம்மா’விற்காக தயாரிக்கப்பட்ட படம் இது. இந்தப் படத்தின் வசூலை வைத்து நலிந்த திரைப்படக் கலைஞர்களுக்கு உதவப் போகிறார்கள் என்பதால், அங்கே இருக்கும் எல்லா ஆர்டிஸ்டும் நடித்திருக்கிறார்கள். மறைந்த ஸ்ரீவித்யாகூட ஒரு சீனில் மம்முட்டியின் அம்மாவாக – ஃபோட்டோவில் – வந்துபோகிறார். என் ஒரே ஒரு குறை மலையாள சினிமாவை அகிலமெங்கும் பரப்புவதில் சிறிதளவேனும் பங்கிருக்கிற ஷகீலாவை கண்டுகொள்ளாமல் விட்டுவிட்டார்கள் என்பதுதான். டைட்டில் போடும்போது, பல நடிகர்களின் ஸ்க்ரோலிங் காட்டுகிறார்கள்.. அதில்கூட அவருக்கு இடமில்லை! பாவம்!!! (இவர் மெலிந்த கலைஞர் இல்லை, படத்தில் நடிக்காமல் இருப்பதால் நலிந்த கலைஞராக ஆகிவிட்டாரோ என்னமோ!)

***********************
சென்றவாரத்தில் நண்பர் பழமைபேசி மாங்கா மடையன்’ என்பதற்கு விளக்கம் கொடுத்திருந்தார். அவர் சொன்னால் சரியாகத்தான் இருக்கும். இருந்தாலும் இதுபற்றி நான் கேள்விப்பட்டது...

தேங்கா மடையன், மாங்கா மடையும் இரண்டுமே புழக்கத்தில் இருந்ததாம். (தேங்கா மடையன் இப்போது இருக்கிறதா?) அதாவது அடிக்கடி முட்டாள்தனமாக செயல்படுபவன் தேங்கா மடையன். எப்போதாவது முட்டாள்தனமாக செயல்படுபவன் மாங்கா மடையன். காரணம் எப்போதும் காய்க்கும் தேங்காய். சீஸனில் மட்டும் காய்க்கும் மாங்காய். அதனால்!

*************************

சென்னை வந்திருந்தபோது நண்பர்களுடனான கலை இரவில் - பாடல்கள், காப்பி அடிப்பது குறித்த பேச்சின்போது வெளிவந்த தகவல்கள்....

‘நான் பார்த்ததிலே அவள் ஒருத்தியைத்தான்’ – இந்தப் பாடல்தான் ‘புது மாப்பிள்ளைக்கு நல்ல யோகமடா’ வின் இன்ஸ்பியரேஷன். பாடிப்பாருங்கள்.

‘தந்தனத்தோம் என்று சொல்லியே.. வில்லினில் பாட..’ – இதுதான் ‘சிங்கமொன்று புறப்பட்டதே.. சபதம் செய்து’. இன்ஸ்பியரேஷனெல்லாம் இல்லை. டைரக்ட் காப்பி!

‘கொக்கரக்கோ கோழி..கொக்கரிக்கும் தோழி’ (கலைஞன்) இதுதான் ‘தோஸ்த்துபடா தோஸ்த்து’ (சரோஜா) என்றான் சகா கார்க்கி.

ஜித்தன் படத்தில் ‘அ முதல் அஃகு தானடா’ பாடலின் சரணம்...

‘ஒத்தரூபா பொட்டுக்காரி
ஒத்துழைக்க கெட்டிக்காரி
தளதளன்னு குலுங்கிவரும்
தாகம்தீர்க்கும் தண்ணிலாரி..’ முழுச்சரணமும் ‘கொடுத்ததெல்லாம் கொடுத்தான்’ பாடலின் சரணமாகிய
‘படைத்தவன்மேல் பழியுமில்லை
பசித்தவன்மேல் பாவம் இல்லை
கிடைத்தவர்கள் சுருட்டிக் கொண்டார்
உழைத்தவர்கள் தெருவில் நின்றார்..’ சரணத்தோடு ஒத்துப் போகும்!

இந்தப் பட்டியல் முடியாது.

சபாஷூன்னேன்!

****************************
முன்பெல்லாம் வெறும் படம் மட்டும் போட்டு, கலக்கலாக ஒரே வரியில், டயலாக்கில் குபுக் கென்று சிரிக்கவைக்கிற நகைச்சுவைகள் நிறைய வரும். சிம்பு, சரண் எல்லாரும் இதில் எக்ஸ்பர்ட்! இப்போதெல்லாம் இந்த டைப்பில் வருவது அரிதாகிவிட்டது.

விகடனில் சிம்புவின் ஒரு ஜோக்.. (2000ல் வந்தது)

நகராட்சி வண்டி நிற்கிறது. அதிகாரிகள் அந்த மோசமான ரோட்டில் நின்றுகொண்டிருக்கிறார்கள். ‘ரோடா இது’ என்பது போல ஒரு முகபாவம் அவர்களிடத்தில். பக்கத்தில் ஒரு கிராமத்துப் பெரியவர், அந்த அதிகாரிகளிடம்...

‘ஆமாங்க.. கடைசியா தேர்தல் சமத்துல போட்ட ரோடுதான். ஜவஹர்லால் நேரு பிரசாரம் பண்ணவர்றார்னு அவசர அவசரமா போட்டாங்க’

படத்திலிருப்பவர்களில் முகத்தைப் பார்த்தால் அப்படிச் சிரிப்பு வரும்!

இதைவிட இன்னொன்று.. 1943ல் (ஜூலை 11 இதழில்) வந்தது..

ஒரு பேஷண்ட் வாயை அகலமாகத் திறந்திருப்பார். பல்டாக்டர் சொல்வார்..

‘வாயை அளவா திறங்க போதும். நான் வெளில நின்னுதான் பல் பிடுங்கப் போறேன்’

*******************

அந்தக் கவிஞர், வைரமுத்து!

இனி இந்த வாரக் கவிதை

தமிழர்
கடவுள்
முருகன்
கும்பிட
நீண்ட
வரிசை
ஜனவரி 1.

-நெல்லை கண்ணன்