வாழ்நாள் இதழ்...!

அனஸ்தீஷியா கொடுக்க
அரசு அனுமதி வேண்டுமாம்.
பெண்ணே..
கண்ணை மூடிக் கொண்டு நட...

******************************************
வார மாத இதழ்களை
வாசிப்பதில்லை நான்...
வாழ்நாள் இதழை ருசித்தபின்..

*******************************************

இதய மாற்று அறுவை சிகிட்சைக்கு
எந்த மருத்துவமனை பிரபலம்?
வா போகலாம்...

*************************************

பிடித்த பெயர் எதுவென்றாய்
என் பெயர் என்றேன்
வியந்தாய்
அதுதானே
உன்பெயருக்குப் பின்னால் இருக்கிறது!

****************************************

உலக கோடீஸ்வரன் என்று
யார் யாரையோ சொல்கிறார்கள்
நீ என் சொத்து என்பதறியாமல்!

***************************************

மூன்றாம் உலகப் போர்
மூளுமென்கிறார்கள்
இளைஞர்களைக்
கடந்து செல்லாதே தேவதையே...

***********************************
யாராவது நினைத்துக் கொண்டால்
புரையேறுமாமே...
அப்படியானால் நீ
எப்போதும்
இருமிக்கொண்டே அல்லவா இருப்பாய்!

************************************
காலையில் உன் கையால்
காபி குடிப்பதில் இன்பம்.
கனவில் நீ இருப்பதால்
எழுந்திருப்பதே இல்லை தினமும்!

*************************************
கோயில் குளத்தில்
மீன்களில்லையாம்.
பாவம் கொக்குகள்
தாண்டும்போது எதற்கும்
உன் கண்களை மறைத்துச் செல்.

***************************************

இதற்கு மேல் கவிதை சொன்னால்
உதைப்பேன் என்கிறார்கள்
அப்படியானால்
இனி நான் உன்பெயர் சொல்லக் கூடாதா?

*********************************************


.